མ་ཡུམ་མི་རིགས་སློབ་ཆེན་གླིང་ན།།
བོད་པའི་གཅེན་གཅུང་ལྷན་དུ་འཛོམས་ནས།།
ཕ་སྐད་གཙང་མའི་སྒྲ་དབྱངས་འདེགས་ས།།
ཧི་མ་ལ་ཡའི་རིག་གཞུང་ཚོགས་པ།།
དཔེ་ཆ་བཟང་པོའི་སྒམ་མཛོད་ནང་དུ།།
ཤེས་རིག་བདུད་རྩིའི་འོ་ཞོ་འཐུང་བཞིན།།
ལང་ཚོ་དར་བའི་སྙིང་སྟོབས་གསོན་པོ།།
ཕུགས་བསམ་སྒྲུབ་པའི་ཕོ་ཉ་མངགས་ཡོད།།
ཟའ་མཇུག་སྤེན་པའི་སློབ་སྟེགས་ཐོག་ནས།།
སློབ་དཔོན་དུ་མའི་སློབ་ཁྲིད་མྱོང་བཞིན།།
སློབ་ཆེན་འཚོ་བའི་གསེར་སྒ་ཁྲ་མོ།།
རིག་གཞུང་རྟ་ཕོའི་སྒང་ལ་བསྟད་ཡོད།།
བྱེད་སྒོ་ཆེ་ཆུང་སྣ་ཚོགས་གང་ཡང་།།
རྩམ་གཟན་བོད་མིའི་རང་གཤིས་མངོན་ལ།།
གནའ་དེང་ཟུང་གི་གར་སྟབས་ཁྲོད་དུ།།
འཆམ་མཐུན་དགོད་སྒྲའི་རྡོག་སྒྲ་འགྲིག་སོང་།།
དྲང་ལྡན་འགན་ཁུར་སྟོབས་ཤུགས་དམ་པོས།།
ཚོགས་མི་བཟང་པོའི་གཞོགས་འདེགས་ཀློང་ནས།།
ལྷག་བསམ་གཙང་མའི་ཉི་མ་གཞོན་ནུ།།
མི་རིགས་སློབ་ཆེན་གླིང་ལ་འཕྲོས་ཡོད།།
མཐུན་སྒྲིལ་ཨ་ལོང་དགུ་སྒྲིག་བྱས་ཏེ།།
རིགས་ཞེན་མེ་ལྕེ་དགུང་དུ་མཆེད་བཞིན།།
སྤུན་ཟླའི་ཚོགས་པའི་མཛའ་བརྩེ་འགྲོགས་ནས།།
མདུན་བསྐྱོད་ལམ་ལ་ཤུགས་ཀྱིས་བསྐྱོད་ཡོད།།
བོད་ལྗོངས་མི་རིགས་སློབ་གྲྭ་ཆེན་མོའི།།
ཧི་མ་ལ་ཡའི་རིག་གཞུང་ཚོགས་པ།།
ཡར་རྒྱས་བརྩོན་འགྲུས་སྒལ་ཚིགས་བརྟན་པོའི།།
འཇིགས་མེད་གདོང་ལྔའི་རྒྱལ་རྔ་སྒྲོགས་ཤིག།